۩۩ ۩۩ ... ديــــــوان العـرافـة ... ۩۩ ۩۩

ديـــــوان .... العــرافـة ....
بقلــم :: حــدوته مصـرية ...

عــرافــة
۩۩ ۩۩ ... ديــــــوان العـرافـة ... ۩۩ ۩۩ ThTFR1F

بَلَوِّن حلمي على الرمله
و اسافر جوه موج البحر
رغم التوهه و الضلمه
بتلمح لمعة الاحلام علي النني . . اللي مستني
شروق الشمس لما يبان
و ببني م الرمال أحلام
هنا بيتنا . .و سكتنا
و فرْح مكحل الرمشين
و لا يفوتنا
و بكتب إسمي ع الرمله
و بَرسم إيد محنيه
و شوق دافي و حنيَّه
و بَجْمَع من براح الحلم أغنيه
و ادندنها و اغنيها
و اعيش فيها . .و اعيش بيها
و يجي الموج علي غفله
يهد البيت و بالعافيه
و بِيْشَوِّه ملامح حرف من اسمي
و انا – بضحك- و اشوف رسمي
بيتبخر . . في لحظة مَد قدامي
مع لون الغروب . . دامي
و أقوله بكره هاستنَى
شروق الشمس من تاني
و هابني البيت
و هانحت سكتي بقوة . . على الرملة
برغم التوهه و الضلمة
هاتفضل شمسنا تشرق
علي بكرة . . تجيب بكره
و تشرق برضه ع الرملة
أبين زين . . و بقرا الكف
و أجمع حرف جنب الحرف
و اقرالِك في فنجانِك
و تظهر كل اسرارِك
علي ضهر الودع مكتوب
و ناديني . . تلاقيني علي بابِك
و باب القلب فاتحلك
بيبان السر و المحجوب
...
و نادتها . . و قالتلي
حبيبتي بكرة هايشوفك
براح الحلم في كفوفك
و نبض الحلم بيفسر خطوط الإيد
ده خط العمر . . وريتهولي بالتحديد
و خط سعادة في عنيكي و ممدودة
و سكة عشق مكتوبة
و باب مفتوح
ورمش مْحَوَّط المحسوب
و بيبخر . .و بيسمي
و يقرا وِرد م القرآن
و بيصلي . .
على الهادي
صباحك صبح مش عادي
و لونه زاهي بالخضرة
و هاتي كفك التاني
و سمي بقلبك الراضي على بكرة
ده ظاهر للسفر سكة
كمان نقطة . . كمان اتنين
و فيه واحده و من سنك
دي غيرانة كمان منك
و حاسبي منها يا بنتي
دي عود مرشوق في نن العين
و شاب حليوة بيخبط على بابك
و بابك فارد الجناحين
و طارد من على عَتَبُه . . غراب الخوف
و فجر نهارك الموصوف
تشوفه العين . .
و موصوفلك . . طويل أسمر
جميل القد و المنظر
و ليه ميت حق يتمنظر
و شايفاه جيّ . . بعد اتنين
كمان ساعتين. .
تقولي يومين . .
و هايروح فين . .
ده مكتوبلك . . و مكتوبلك تشوفه العين
. . . . . . .
صحيت م النوم على بكرة/ و دق الباب
جريت أفتح و رمشي مكَحَلُه قولها /لاقيته جواب
و مكتوب فيه
" فارس سلاحه ضحكه عاليه مجلجلة
عصفور كناريا صوته مغزول بالغنا
ورق الخريف . . تتصوري . .
اخضر و رسمة قلب فوقه تزينه
فارس و حالف يوم هايهديكي الفرح
جي وراسملك ع الجبين توب الفرح
و مزينه بألوان ربيع
حالف ما يجي في يوم يبيع
لكنه بايع أرضه من يوم ما اتولد
و معاه من الأموال جبال
هاتمدي ايدك تبقي ليه أم الولد . .!!؟؟
و الرد مستنيه قوام
لجل ما تزغرد بيبان . . القلب
يبقالك سَند "
رَدِّي . .!! كل حروف كلامي تقوله لأ
ازاي يكون هُوَّا السند
دَ اللي اتسند
على حيطه مسروقه الجدور من ارضها
راح يندفن . . و الروح بصوت مبحوح تئن
و كل خيط موصول بأنفاس الحياه
راح يندبح . .
و الضلع متضفر بآه
عَ اللي فكر انه يوم مركب نجاه
دَ حصان خشب
و مزوقينه بألف لون
و مرَبَّطينه باللجام
و المستحيل خطوة لأمام
تبقا " لأ " بعلّو صوتي هاقولها ليه
و لا تسألوني ازاي و ليه
هاستنى طول العمر فِــــ الشاطر حسن
و هاكونله ست الحسن . . شاهد يا زمن
و المهر أرضي . .و كبريائي . . و عزتي
واجب عليه . .

***

مزاد مفتوح

۩۩ ۩۩ ... ديــــــوان العـرافـة ... ۩۩ ۩۩ ThTFR1F

وكتاب مقفول
حالف ما يودي الصفحة الجاية لبر أمان
و الأمن مالاقي سنين عنوان
و العنوان تايه أبعاده
دا البُعد الساكن على بابه
حالف ما ينام
و يا آهة قلبي المجروحه
في متاهة صوتي و مدبوجه
علي سِن الورقه المسنونه . .
و الدم أهو سال
و خريطة وطني السايل دمه على الأيام
تتفتت حِتَّه بحِتَّه
و خَط بخط . .
السكة لفين؟؟
و بقينا العام الكام بعد الألفين . .!!
و لإمتى و فين هانبيع الأرض
. . . .
بايعين القلب الحاضن جوه عنينا سُكات
" عواد باع أرضه يا ولاد "
هاتبيعوا العرض .؟؟!!
و العرض و معروض في الفاتارين
و ضميركم فين . . بايعينه لمين . . ؟؟!!
بايعينه بكام . . حَبِّة أرقام . .؟؟!!
و مزاد مفتوح
" ألا أونا " . . ضمير البني آدمين . . نقفل على كام .؟؟
" لا دُوَّا " . . تراب الأرض كمان
اشتروا يا اسيادنا عليهم " عرض "
و " تْرِي " . . شاريين و لاّ نقول ايه ؟
بايعينه يا بيه .

***

ريشة جناح

۩۩ ۩۩ ... ديــــــوان العـرافـة ... ۩۩ ۩۩ ThTFR1F

روحي كمنجة من الورق. .
صوتها . . بُكَّـــا
صوتها اتسرق . .
مركب ورق. .
في النوَّه معروف المصير . .
هايشيل شراعه الف ميل . .
يرتاح في جوف البحر . .
ويَّا الغرقانين . .
روحي . . أنا
عصفور ضرير . .
شَّــــــاب النسيم . .
لمَّا التقى مع غنوته . .
و فْـــ سن ريشته و الدوايه و القلم . .
مليون ألم . .
يحدف شِبَاكُه ع العيون السهرانين
و يعلق الرمش الحزين . .
ع المشنقه
عنقود كلامه . . و انفرط قبل الاوان
مفْضِلْش منهم غير كلام . .
مجهول . . و تايهه الترجمة
مفْضِلش منهم غير حروفه الدبلانين . .
ينده بعلو الصوت . . و مين
مين اللي قادر . .
يسمعه
مين اللي راضي . .

يسمعه لكنه قبل ما يتشنق. .
فكر و قال . .
هاهرب قوام . . بكرة الصباح
هاهرب باخر ريشه باقيه م الجناح
لكنه قبل الصبح . . مات
و لسه ريشته معلَّقه فــ طرف الجناح

***

اسكت بقى

۩۩ ۩۩ ... ديــــــوان العـرافـة ... ۩۩ ۩۩ ThTFR1F

الحلم الساكن مات . .
و الصوت مخنوق بسُكات
و العمر المفرود ضعفه
و المكسور بالأنات . .
تايه . . ضعفان . .
مجرور اوعاك تستنى يثور . .
أو تطلع طاقة نور . .
علي دربك أو تلقاك . .
اياك و كمان اياك . .
و ان مره الحلم نداك . .
ما تسلم جفنك ليه. . . . ..

اسكت بقا . .
يا حلم طول عمره بيستنى اللقا . .
و الا يوم هايجي في سِكتك
دا الخوف هايجي يسَكتك
مهو صوتك المجروح . . بيجرح قلبنا
فاسكت بقا . .
اسكت و سيب الكون سُكااات
ده الكون ممات . .
أصل اللي عاش . . زيّ اللي مات
و الخوف ساعات . .
بيكفن الصوت الجهور . .
و يكفنك . .
و الا تلمح الحد اللي بين . . ضلمه و نور
و يزلزلك . .
و يشد جدرك من براح الأمكنه
يمسح حدودك . . يرسمك
الفين كابوس . .
مليون كابوس
عمَّال يدوس . .
جوه شقوق الروح . .يبعتَّر شملها
و الا أي حاجه تلمها . .
أو حتي يوم هاتضمها . .
فاسكت بقا . .
و الا يوم تفكر تاني . . تستنى اللقا . .
عمرك ثواني من دهور الأزمنه . .
و الساعة فيك متفتته . .
متقسِّمه. .
متقسمه . . لحزن و قلق . .
بحر و غرق . .
حتى شموس الفرحه فيك . . متكتِّفه
مصلوبه فوق ضهر الظلام
و القلب نام . . ويَّا الآلام . .
اللي عليه . . متستِّفه
فاسكت بقا
اسكت بقا
اسكت بقا

***

على جبين الوطن

۩۩ ۩۩ ... ديــــــوان العـرافـة ... ۩۩ ۩۩ ThTFR1F

بنجمع خطوط الحلم
نغزلها مراكب نور
تعدينا لبر جسور
و نوصل بيها للمينا
و ع المينا هاتلقانا
قلوب تجمع أسامينا
و هايرفرف و بادينا
علم طاير لفوق عالي
جناح النسر بيلالي
علي ريشه . .
شعاع الشمس يحلالي
و رغم التوهه و الضلمه
و ليل غامق. .
هاجمّع كل أولادي
و هاحكيلهم عن القصه
حكاية ديب و خرفانه
و رغم الحزن و الغصه
هاكملها و لو عانوا
هاكملها . .
ليوم نوصل نهايتها
و ترسمنا . .
علي جبين الوطن غنوه
و ترسم سيف
و فارس يمحي كل الزيف
و شمس شروق. .
و نسمه في عصر
و هاتلالي ياحلوة يا مصر

***

محكمة العسكر

۩۩ ۩۩ ... ديــــــوان العـرافـة ... ۩۩ ۩۩ ThTFR1F

سكة الرايح ما يرجع
يا سواقي يلاّ دوري
أصل أنا الواقف في دوري
لجل ما اعلنكم حضوري
و بحضوري زيّ غايب
ليّا . .لُه في الجرح نايب
ده الشقا فـ كوبايتي دايب
أصل سُكرنا القوالب
سَكَّر الشاربين ضروري
لجل هذا . .!!
محكمة عسكر بلادي
طلعوا روح القانون
ع اللي شارب و اللي عادي
و اللي لسه في كارُه بادي
حادي بادي. .
بادي يحلم حلم غيره
تبقا سرقة . .!!
سيرُه عايب
قطع ايده يبقا واجب
و اللي واجب . .
يسمع الحكم و كيانه بحر فاضي
موجه هادي
هادي صوته
لجل ما يعلنَّا موته
يحضر العسكر يفوتو
اياخدوا باقي الروح معاهم
لجل ما يحاسبوها تاني
دي الجريمه قتل/و الميت دَ جاني
فاكر انه كان هيفلت قال بموته . .!
ناسي ان الحكم صادر
و المحاضر ناقصة اسم . .!!

***

قلبي أنا

۩۩ ۩۩ ... ديــــــوان العـرافـة ... ۩۩ ۩۩ ThTFR1F

قلبي أنا عصفور
عمّال بيتمخّتر
بيحب غصن زتون
طارح . . جميل أخضر
بثماره مالي الكون
و الضلة فين ما يكون
قلبي أنا . . . . . . عصفور
. . . . . . .
قلبي أنا عصفور
و الفجر كان له جناح
نفسه يعدي السور
سارح في أرض براح
قلبي أنا . . . . سواح
. . . . . .
قلبي أنا سواح
هايم في روح إنسان
بيبدر الأحلام
تطرح . .أمل و أمان
قلبي أنا . . فنان
. . . . . .
قلبي انا فنان
و حروفه بتعانده
عمّاله تجري قوام
وما حد بيسانده
لكن وقف حرفين
الأولاني . . كاف " كـ "
و التاني كان النون " ن "
إمتى هاينسى يخاف . .!!
و صوته يملا الكون
قلبي أنا . . مجنون
. . . . . .
قلبي أنا مجنون
و جنانه فاق الحد
بركان صخب و سكون
حصان و فك السرج
قـلـــ ( أنـا ) ــبـي

***

كلاكيت . . عاشر مرة

۩۩ ۩۩ ... ديــــــوان العـرافـة ... ۩۩ ۩۩ ThTFR1F

أيامنا تايهه معديّه
تايه الهدف من غير غيَّّه
في بلاد كان اسمها عربي
هفي علم كان أو حتى في حلم

برواز ومن غير الصورة
عيدان سنابل مكسورة
قلوب حزينة و مهجورة
حروب كتيرة ومن غير سلم

و السِّلْم سَلِّم يا سلامة
و جيوش عِدَّا قاموا قيامة
نايمين و ما علينا ملامة
عيونّا جوه كهوف الحلم

بايعين و بنبيع في قضية
فايدتها إيه الحرية
و في إيدنا عملة مضوّيه
بلادنا إيه . .دي بلادنا " جنيه "

ريال . . دينار و دولار يورو
تسمع كلامهم و تقوله
و تعيد تذيد . . ليلنا بطوله
من غير ما تفهم أو توعى

أمريكا ترسم في خريطة
تشيل جبل . . تعمل حيطه
سكوت و هس بلاش ظيطه
عايزين نشوف . . دي نهاية الفيلم

كلاكيت يا بلدي . .لتاني مرة
و التالتة و الرابعة المُرَّة
قدس. . و عراق . .لبنان سوريا
و كله جيّ عليه الدور

***

شمسنا النعسانة

۩۩ ۩۩ ... ديــــــوان العـرافـة ... ۩۩ ۩۩ ThTFR1F

الشمس بتْفُك ضفيرتها . . ع الخلايق
اللي نايمين . .من . .ولادتهم لموتهم
هو فيهم حد فايق . .؟!!
و الا في المحروسه دايق
أي فرحه و العروسه أم طرحه
شايله ليه الهم بدري
و الوليد الاخضر. . بيجري
و الكبير ضعفان و خايف
و اللي عَمّيان و اللي شايف
و اللي ما يحرك شفايف
و اللي كان م الطينه ودنه
و اللي مسنود و اللي ساند
و اللي من . . ظلمه و ذايد
عـ الخلايق هو ده نافع و لايق . .؟؟!!
و اللي مظلوم و اللي ساكت
و اللي همُه في عينه نابت
و الليـ ما بيشوف في ليلُه
أي نوم
و اللي علي راسه تحوم
الحدادي . . . .و اللي عادي
و اللي مش عادي كمان
و اللي طالع من زمان
يدّن في مالطه . .
و اللي غِربانُه في ليل
حايمه و حاطه . .
و اللي تايه عن محَطّه
و اللي راكب و اللي سايق
و لسه برضه شمسنا
عماله بتفك ضفيرتها ع الخلايق
بس ليه مَعْمِّيَه جداااا ع الحقايق. .؟؟!!

***

إيه العمل

۩۩ ۩۩ ... ديــــــوان العـرافـة ... ۩۩ ۩۩ ThTFR1F

يا وكسة القلب اللي خاف
فــِ سنين عجــــاف
يزرع ما تطلع سنبلة
مكسور حدود المسألة
شاطرين أوي فـ شغل الجَلا
و مفكرينها . . مَرْجَلَّه
شايلين سلاحنا من ورق
خايفين في لحظة يتسرق
واقفين في عز الصهد . . خايفين م الغرق. .!!
رافعين ادينا للسما
تايهه وشوش الأمكنة
و قناع مشوِّه وشّــنا
فاضحة العيون روح الغبــّــا
مجهول و سارح فـِ الخلا
غرقان في بحر الأسئلة
مجهول ما قادرين نعرفه
مجهول وراه نستعطفه
لجل أما ينطق أو يبان
حالف يكون . . أخرس جبان
مدبوح على لسانه الكلام
مكسور نغــــم
الحانه من ناي الألم
رافع عنية لقبة سمـــا
قبلينا قالوا في المثل . .
ترفع عنيك . . تحصد تعب . .!!
ليه العجب . . ؟؟!!
عارفين سبب؟؟
دَ الحل غالي المهر . .و بعيد ع الايدين
و ادينا من مليون سنه
مقطوع جدورها م الكتاف
و القلب خاف . .
عميان ما شاف . .
و ان مره شاف . .!
يحلف بإنه في يوم ما شاف
دَ عماه موَّرث فــِ الجينات
من جد جده . . للولاد
عارفين بإن الحل فـِ إدين الكبير
و كبيرنا رافض جهلنا . .
حالف ما يوم يفتحلنا .
عقله الخطير . .
روحه الأسد. .
مرعوبه من سيرة حسد
قاريين عليه سورة المسد
راقيينه من عين العِـــــدا
و مبخريين الأوردة
لجل أما يرجع فيها دم
ايه العمل . .؟؟؟!!
عايشينه غمّ . .
شاربينه هــــمّ
مستني نن العين أمــــل . .؟؟!!
فاكر في يوم هايشوفه جد . .!!!
يا وكسته . . دي ماشافها حد .

***

عروسة ماريونت

۩۩ ۩۩ ... ديــــــوان العـرافـة ... ۩۩ ۩۩ ThTFR1F

متلوِّنه وشوش الحقيقه
و الممثل بهلوان
رافض يبان
على وشه لون الآهه من خلف البيبان
أو لون عنيه اللي اتملت تعاريج
بألوان الكآبه و الرتابه و الخنوع
أو ذل ساكن في الضلوع
سارق خيطان كل الشموع
زارع فـِ عِزّ نهارنا ليل
ملعون. . جبان
و معلَّقينه بالخيوط
زي العروسه الماريونت
بيحَرَّكوه . .
و يرقّصوه . .
و يضَحَّكُوه . .
و برغم ان الحزن ع المسرح رداؤه
مسروق حياته و كبرياؤه
فنان فـِ موهبته و اداؤه
و السَقْف فوق كل الايدين
موْشوم على جبين الحزين
رغم ضحكه اتْقَسِّمِت . . و اتلوِّنت فوق الوشوش
فَرَحُه البشوش
مولود جبان
مقتول جعان
قافل عيونه و البيبان
لا شافنا . . و احنا ماشفنهوش
دي اضاءة المسرح فشوش
و ستاره سوده و اترمت فوق الوشوش
مكتوب عليها الخــــاتمه

***

خيوط الحلم

۩۩ ۩۩ ... ديــــــوان العـرافـة ... ۩۩ ۩۩ ThTFR1F

خيوط الحلم بتطارد سواد الحزن في مرايتي
و فـِ مرايتي بيوحشني أشوف نفسي
جدايل فرحه بتضلل على حسي
تصَحِّي فـِ رموشي الحياه و تقولها حسي
يفُوق القلب و الرمشين و هايّرسوا
مراكْبي . . . و المراكْبِيَّه
على روحي بحنيَّه
ولَمِتْهُم مصحباني ووحشاني
وينْده قلبي روحي تردلُه " جيَّه "
وما اتاخر
برغم العِشْرَه ويّا التوهه والغيبه
ما تتأخر . .
ولاّ ثانيه
ما صدقنا نقابل فرحه لو صدفه
ودنيتنا كما هيَّ
كما كانت . .
ما تتآمن . .
ولاّ سابت. .
جدور الفرحه يوم حيَّه
ومهما تكون هي الفانيَّه

***

حسبة الأحلام

۩۩ ۩۩ ... ديــــــوان العـرافـة ... ۩۩ ۩۩ ThTFR1F

بنرمي الخطوة ع السِكَّه / بتتكعبل
و حلم اليوم . . نقص حتَّه
و بكره نرمي من تاني
بواقي الخطوه و الأحلام
و ينقص كام . .؟؟!!
و يفضل إيه . .؟؟!!
بواقي رُكَّام . .!!
و نِجْمَعْها. . نلاقيها ما تقبل جمع
نقَسِّمها على روحنا / تزيد الهَم
بنطرح منها كام خطوة
محوّطها السواد و الغم
نلاقي الطَّرْح من روحنا
كإنه ما كان
و لون الحِنَّه متخضب . . بلون الدم
و لاّ لون الألم بيروح
شقوق الروح
معشش فيها لون الخوف
على بابها . . عناكب بالألم بتطوف
و تغزل للألم توبُه
دَ توبِ اسود على قلوبنا صَبَح ملفوف
و موميّا الروح بقت عَمْيَّه / و لاَ بتشوف
فـِ متحف قلبنا المهجور
بتتمزع خيوط الفرحه / و المغزَّل عموده انهد
هنستناه يكون . . و يدورو
يغزل حلمنا فـِ سطورو
عارفة فين بدايتها
بياض غُرِّة حصان منصور
يكون بيتها. .
وفارس حلمها ملاّح في سكتها
و زارع حرف بيشقشق
على وش البراح / طارح جدايل نور
و فارش ع الطريق ضله . . قناديل للأمل بتدور . .

*** *** ***

__________________